2011n sortutako Arabako konpainia erreferentzietako bat dugu argiztapenak eragindako ingurumen-inpaktuen alorrean eta teknologia propioa garatu du neurketak egiteko.

Araba Ekinean gaur abiarazi du “Etorkizuneko elkarrizketak” serieko bigarren bideoa, tokiko kazetari baten –Andres Goñiren– eta bere lana Arabako ekonomiaren funtsezko arloetan garatzen duen pertsona ekintzaile baten arteko elkarrizketak biltzen dituen ikus-entzunezko programaren barruan, hain zuzen ere. Susana Malón ekintzailea dugu bigarren atal honetako protagonista, Lumínica Ambiental enpresaren sortzailea eta arduraduna, argiztapenak eragindako ikus-entzunezko ingurumen-inpaktuen neurketan estatuko eta nazioarteko erreferentzia argia den enpresarena.

Elkarrizketa Gasteizko Udalaren Basaldea Nekazaritza Ekologikoko Enpresen Zentroan egina dago, eta 2011n sortutako enpresa arabar honen 10 urteko historian zeharreko errepasoa egiten du, zeina bere sektorean aitzindaria izan baitzen. “Izan ere, bidea pixka bat zabaldu dugu nolabait, gai horren inguruko legeak egin aurretik ere. Argi-kutsadura kontrolatu beharreko alderdi oso garrantzitsua dugu, eta askotan beste batzuen atzetik joan da, hala nola kutsadura atmosferikoaren edo akustikoaren atzetik, baina azterlan ugarik adierazten dizkigute kutsadura horien inpaktu guztiak, baita gure osasunean eragindakoak ere. Horregatik, oso garrantzitsua da neurtzea eta zuzentzea inguruneko afektazio nagusiak saihesteko”, Malónek bere mintzaldian azaldu duenez.

Gasteizen finkatutako ekintzaileak adierazi duenez, konpainiaren arrakasta nagusietako bat espezializazioa izan da, “horri esker krisialdiei eutsi ahal izan diegu eta sektorean erreferentzia gisa kokatu“. Izan ere, enpresa oso garrantzitsuentzako lanak egin ditu, hala nola Toledoko Le Puy du Fou parke tematikoarentzat. Azken hamarkada honetan, Lumínica Ambiental enpresatik teknologia propioa garatu dute neurketetarako unibertsitatearen eta beste zentro teknologiko batzuen lankidetzarekin, eta gau-zeruari buruzko kalitate-egiaztapenak ere egiten dituzte, “turismo astronomikoa bultzatzeko gero eta eskatuagoa den alderdi bat“, Susana Malónek adierazi duenez. Bestalde, adierazi du, halaber, Gasteiz izan zela argi-kutsaduraren alderdi batzuk kontrolatzen hiri aitzindarietako bat, eta erakundeen laguntza funtsezkoa gertatu zitzaiola bere proiektu ekintzailea abiarazteko.

“Etorkizuneko elkarrizketak” programak Arabako pertsona ekintzaileekin egindako elkarrizketak biltzen dituzten beste 2 bideo gehiago hartuko ditu barnean, eta Ekin Day ekitaldia egin artean argitaratuko dira, hau da, Araba Ekinean ekimenaren jardunaldi nagusia baino lehen, eta ekitaldi hori urriaren 5ean izango da, Europa Jauregian. Webgunearen bidez ikusi ahalko dira ikus-entzunezko horiek, eta sare sozialen bidez ere zabalduko dira. Horrekin batera, “ekintzailetza-katea” ekimena ere garatzen ari da, alavaemprende.com webguneko gune bat, zeinean proiektu ekintzaile batzuek beste batzuk gomendatzen dituzten Arabako ekosistema ekintzaileari buruzko ezagutza hobetzeko ideiarekin. Edonor sar daiteke gune horretan eta formularioa bete lurraldeko ekimen ekintzaile bat gomendatzeko.